<div id="readability-page-1"><div id="conimg_0"> <p>上周四早上 7 點，我正悠悠閒在茶記歎奶茶，先睇睇手機有乜嘢訊息要覆之際，突然彈出肥女兒最新 emoji 嘲笑公仔，附字：「肥爸，快啲睇《星島日報》A7 版，有張好搶眼嘅濫竽充數現代版大相！」</p><p>講到咁吸引，睇咪睇！揭呀揭，哎吔吔，邊個咁大整蠱？竟然出半版宣傳：名家分析、穩健致富、盡在星島財經！C 位乃我個豬頭嘜，同林本利教授及曾淵滄教授等真正財經名家及經濟學者平排刊出，簡直靠害。</p><h2>財富主要分配 3 類資產</h2><p>之後整個早上都俾百厭老友窒：好威啫企 C 位、終於上咗神枱喇、下周俾乜冧把呀……。夠喇喂，有勞各位高抬貴手咪再玩我。唉，攪到今期唔知寫乜好。咁啦，蛇年最後一日，檢討自己全年戰績啦。</p><p>讀者必知，我是一個非常保守的理財者，已經年紀老邁，絕對不會將養老金冒險。故此，除供滿的自住物業外，財富主要分配在：一、政府年金，以保證自己月月有糧出，直至離開世界；二、各式政府債券；三、幾隻「政府唔俾得佢死」的股票，包括中電（002）、港鐵（066）、國泰航空（293）及港交所（388）。</p><h2>4 大柱躉股 全部有升有息</h2><p>第一及第二項回報可準確預測，安心。第三項又如何？單單買「政府唔俾得佢死」概念，已十分放心，股價只會有升有跌，公司絕不會「蒸發」。究竟以上 4 隻，今年戰績如何呢？</p><p><strong>（一）中電 52 周最低 60.45 元，如今接近 77 元新高，4 厘利息，正！</strong></p><p><strong>（二）港鐵 52 周最低 23.8 元，如今約 37 元，也是邁向全年新高，2.8 厘息。</strong></p><p><strong>（三）國泰 52 周最低 8.5 元，如今大約 13 元，也接近全年新高，息率 5.35 厘。</strong></p><p><strong>（四）港交所 52 周最低 283.2 元，最高 466 元，過去 7 個月長期 400 元以上，接近 3 厘息。</strong></p><p>4 隻我的柱躉股，蛇年全部有升有息，升幅相當可觀。</p><p>至於用閒錢玩玩吓的其他兩隻，維他奶（345）派息後加早前賺咗少少，打和；但 lululemon（LULU）則未知何時見家鄉。</p><p><strong>資深傳媒人 曾智華</strong></p><p>相關文章：投資大忌「超」字陷阱｜曾智華</p> </div></div>

香港交易所

國泰航空

中電控股

港鐵公司

<p>曾智華在《星島日報》A7 版上被列為財經名家，分享其保守的理財策略。財富主要分配在政府年金、政府債券及幾隻穩定的股票，包括中電、港鐵、國泰航空及港交所。四隻股票在蛇年表現良好，均有升幅和穩定的息率。中電股價從 60.45 元升至 77 元，港鐵從 23.8 元升至 37 元，國泰從 8.5 元升至 13 元，港交所維持在 400 元以上。</p>

濫竽充數現代版｜曾智華