見到$泡泡瑪特(09992.HK)討論區咁熱鬧，我都忍唔住講兩句：

啱啱《人民日報》一篇文講到要加強對盲卡盲盒嘅監管，令泡泡瑪特今日低開最多 6%，從高位計累跌超過 17%。睇落好似風頭唔再，甚至有人話「官方降溫」，但我反而覺得，呢個跌勢可能係一個中線轉勢嘅開始，點解？

《人民日報》並冇點名泡泡瑪特，只係對整個盲卡市場發表評論，加強監管更多係針對青少年消費，而唔係否定潮玩文化本身。政策風險出咗，市場反應完，之後未必再有新一輪打擊。重點係！！就係幾日前，《新華社》重磅發文話 LABUBU 係「中國創造嘅頂流」，代表年輕人情緒出口，刷新世界對中國文化品牌嘅認知。呢種論調，其實係對泡泡瑪特長遠價值嘅肯定。

潮玩消費背後講緊係 IP 價值同文化共鳴，泡泡瑪特過去幾年成功孵化 LABUBU、SKULLPANDA 等 IP，仲喺國際市場做緊品牌輸出。短期震盪係情緒反應，長線故事未完。

講埋市場走勢，隻 9992 從 233 蚊低位已見買盤吸納，即日跌幅都收窄咗，短期或會喺 230 至 250 區間整固。只要唔失守 230，下一波反彈唔出奇。@安德森 @Shivv