全職美股交易員分享 + 個股點評🔥

尋晚@投資從零開始 (Andy)場美股直播，由大市一路講到個股，仲分享咗一啲風險管理嘅貼士，小編幫手整理咗以下筆記，俾大家一齊學習📝：

1）點睇大市破頂，但個股唔跟升？📊
S&P 500 由 6 月到 8 月試咗三、四次先至升穿關鍵壓力位，中間每次都喺 EMA50 度打返轉頭，而最近突破之後，個市亦唔似 4 月至 6 月嗰時行得咁順，唔少股票都係升少少就縮返落嚟，所以指數破頂同個股升唔升得郁，其實係兩件唔同嘅事！

佢又提到市況好嘅時候，符合佢選股條件同時創歷史新高嘅股票可以去到百幾隻，但直播當日只得返 27 隻。喺部署上，唔會睇個市場太淡，但都唔係非常之樂觀，目前由防守慢慢轉去半攻半守。

2）近日大市點解會回調？📉
中國、英國、日本喺 6 月都減持美債，近幾日回調嘅主要原因， 30 年期美國國債孳息升到 5.31 厘，創係 19 年新高。一筆錢擺喺長債乜都唔使做已經有 5.31 厘年回報，而股票要承受波動先至有機會換到回報，資金自然有部分會搬過去。但 Andy 睇法係，只要孳息唔係一夜之間再抽高，實際影響其實有限。

3）除咗科技股，仲有咩板塊值得留意？🌟
呢刻除咗科技股， 舊經濟板塊例如銀行股都值得關注。長息升、短息唔郁，銀行畀客戶存款嘅利息成本冇變，但新投出去嘅資金，例如國債同房地產債，收益率就跟住長息升，中間差價自然闊咗，利潤就變多咗，$美國銀行(BAC.US) 就係沿住 EMA20 向上嘅銀行股例子。

同一個主題，日股都有$三菱日聯金融集團(MUFG.US) ，技術上同樣係沿住 EMA20 一直上，不過驅動力來自日本央行加息。日本銀行一直用近乎零成本嘅資金借錢出去，日本央行一加息，借出去賺返嚟嘅錢就會變多。

4）要贏錢，勝率唔洗高💡
只要風險回報比做到 1 賠 2，勝率得 40% 一樣賺到錢；做到 1 賠 3，勝率 30% 都得。所以佢每筆交易都係先諗定蝕幾多、賺幾多，先至落手。當遇上業績期，佢會先查定市場預期嘅業績日波幅，如果隻股票預期波動 6%，但佢手上冇 6% 嘅帳面緩衝，佢就唔會留倉過業績。呢個唔係睇好定睇淡，純粹係風險管理嘅動作。

重點個股點評 🔍
$閃迪(SNDK.US) ：4 月 1 日入，一路沿住 EMA20 揸住，跌穿之後分三次沽清，而家冇貨。近日反彈嘅催化劑，來自市場推測蘋果唔會單純因為美國政府嘅要求，就停止向中國採購記憶體、改買成本較高嘅美國貨；市場由此見到記憶體需求依然未見頂，帶動成個板塊。Andy 話唔再入唔係覺得佢會跌或者會升，而係隻股而家單日波幅太大、距離 EMA20 亦太遠，暫時只放觀察名單。

$泰瑞達(TER.US) ：8 月 4 日，即係 S&P 突破同一日，以 397.4 美元入，止蝕大約 7 至 8%，博返去 488 至 490 美元嘅歷史高位，賠率大約 1 比 3。基本面，半導體測試佔 TER 約 84% 收入，機械人業務得約 7.5%，但後者係市場肯畀高估值嘅原因。

但風險都要留意，一方面係最新一季整體按季增長得 3.6%、半導體部分按季只有 1%，低過上季嘅兩位數——市場一旦當成放緩跡象，資金就未必願意再推上去。

另一方面係業務過度集中，AI 資本開支如果減速，對收入影響會好大。不過業績出咗之後股價其實有個小反彈，要再觀察呢啲位置守唔守得住。

觀眾問股 🙋
$邁威爾科技(MRVL.US) ：約 212 美元入，賠率 1 比 2.5，下方參考約 163 至 165 美元嘅前底，上方望約 330 美元。直播當日做咗個假突破又跌返落盤整區間，先上望 230 美元，下方睇 200 至 210 美元。

$谷歌-C(GOOG.US) ：7 月 23 日業績後現金流首次轉負，市場即時拋售，之後市場自己修正咗睇法，認為錢係投去 AI 研發，股價慢慢收復。但業績後留低咗個裂口，衝到約 375 美元連續三次受阻，EMA20 亦開始失效，留意約 340 美元嗰個裂口起點守唔守得住。

最後，Andy 都提醒返大家，任何關鍵位置都只係一個 level，唔係話到咗就一定要走、穿咗就一定玩完。大家交易要做到 Trade What We See，而唔係 Trade What We Think，執行紀律，切忌跟單照抄🫰！

如果想重溫足本直播，可以撳依度睇返🫶！

免責聲明：內容僅代表作者個人觀點，不代表長橋立場，亦不構成任何投資建議或買賣要約。市場有風險，投資須謹慎。